Mona 的个人资料-=Back 2 Life=-照片日志列表更多  |  工具 帮助 |
|
|
The Best Is Yet To ComeThe Best Is Yet to Come... جملة لسا سامعاها امبارح فى مسلسل اجنبى... منتهى التفاؤل بان الايام الى جاية احسن وان اسعد ايامنا لسا معشناهاش.. تجاهلت ان حلقة المسلسل نفسها كانت نكد وان الجملة دى تبعها موت واحد من أبطال المسلسل... بس حقيقى مش فاهمة...ياترى الاكتئاب هو الطريق الصحيح للحياة.. ولا نفضل عايشين فى الوهم متخيلين الحياه كلها هتتحل لوحدها فى لحظة ونعيش ايامنا السعيدة حقيقى دلواتى كل طرقى اتفقلت اى امل كان عندى فى يوم من الايام انتهى يا اما بكارثة او بخيبة امل او مات بفعل الملل.. الاسباب كلها اتقطعت طبعا الامل فى ربنا موجود اكيد هيحلها من عنده ولغاية ما دا يحصل اكيد مش صح اننا نفقد الامل عشان دا امل فى ربنا... وانا ثقتى فيه كبيرة اوى هيحل كل حاجة انا متاكدة بس نقول يارب 4月11日 Hoping 2 Die There!!!!!السلام عليكم... اولا ازيكم كلكم...وحشتونى اوىى..ووحشنى هنا جداااااااا... ثانيا ...يارب تكونوا بخير وكويسين..
ثالثا..انا عارفة ان بقالى فترة مدخلتش لان الوضع كان جنان بقاله فترة عندى... بس مش عارفة ليه حاسة ان الامور هتبدا تتحسن إن شاء الله...
اخر اخبارى..ان النتيجة طلعت اخيرا واتعلقت رسمى...وانى الحمد لله نجحت والتقدير كويس... بس طبعا مرعووووووووووبة مووووووت من الترم دا ونفسي اكمل بنفس التقدير لان هيبقى شكلى وحش جدااااااا لوالتقدير نزل...دعواتكوا بقى... اختى الحمد لله جابت بنوتة زى القمر وسميناها "فرح" يعنى انا بقيت خالتوا كمان....الناس دى شكلها مستقصدانى...مش كفاية عمتو...لا كمان بقيت خالتوا... بس على مين... انا منفضة على الاخر عشان اشيل من دماغهم اى أمل إنى ممكن أعيش دور الخالة وابدأ بقى اجيب لعب وحلويات او ادفع عيدية لحد فى العيد...ينسوا خااااااالص... صور البنوتة ان شاء الله هنزلها قريب ان شاء الله مع بلوج خاص بيها عشان اعرف ارحب بيها بشكل كويس فى الدنيا بتاعتنا..
اخر خبر انى مسافرة بكرة ان شاء الله ....طالعة عمرة وهرجع يوم الحد الى هو يوم 22 فى الشهر... فرحانة....يعنى... قلقانة....جدااااا... موعوبة...موووووووت.... نفسي استفيد من الفرصة دى اوىىى لانى فعلا فى أشد الحاجة ليها..ومرعوبة اضيعها واكون زى ما روحت زى ما رجعت... معرفش الشعور دا طبيعى ولا لا....بس انا بدأت اتخنق منه بجد...معرفش ليه مفيش حاجة معايا بتمشى طبيعى.... وليه الحياة بالنسبة لى سلسلة طويلة من القلق والتفكير والتحليل والمشاكل... ادعولى بجد ربنا يكرمنى هناك....وانا ادعيلكوا كلكو ومش هنسي حد إن شاء الله..
كيت...هدعيلك ربنا يكرمك ويحققلك كل الى تتمنيه.... مها..هدعيلك ربنا يوفقك وتبقى أحلى صحفية فى الدنيا.. رويال...هدعيلك ربنا يخليكى للناس الى بتحبيهم ويخليهم ليكى ويديم بينكوا الحب... سمر...هدعيلك ربنا يكرمك فى حياتك ويحققلك أحلامك...ويسعدك أستاذ احمد...هدعيلك ربنا يبارك لك فى ابن حضرتك وتشوفه عريس زى القمر... أحمد....هدعيلك ربنا يوفقك فى حياتك ويرزقك بأحلى بيبى جيرل.... عبد المنعم...هدعيلك ربنا يكرمك ويحققلك الى بتتمناه سمسم...هدعيلك ربنا يكرمك يارب وحققلك أحلامك كلها باسم...هدعيلك ربنا يوفقك فى حياتك ويكتبلك النجاح مصطفى على...هدعيلك ربنا يكرمك فى حياتك إن شاء الله بجد هدعى لكل الناس الى شرفتنى هنا ربنا يكرمها ويصلح لها حياتها... انا مسافرة بكرة الى هو الخميس يعنى..الساعة اتنين الضهر....ان شاء الله هدخل على السبيس قبلها..لو اى حد عاوز حاجة من هناك...احنا فى الخدمة...
هتوحشونى اوىىىى... وإلى لقاء 12月29日 كل سنة وانتو طيبين 2في 1الساعة التاسعة وعشرة دقائق مساءً..
من أمام كمبيوترى الحبيب أحدثكم..
يستقر بجانب الكيبورد ..كوب ساخن من الينسون
-كان لابد من عمل هدنة مع النسكافية بسبب دور برد تقيل أبى إلا وأن بستقبل معي العام الجديد-
ولهذا كان لابد من الاقلاع -مؤقتا- عن النسكافية والشاى..وباقي شلة "اصدقاء الكفاح"...والتحويل للمشروبات الطيبة..أمثال الينسون والنعناع..وكل تلك المشروبات التى مجرد ذكر اسمها يضعك فى السرير مع احساس كافي بالتصالح مع العالم..وفترة نوم لا تقل عن ست ساعات
بعد الاستطراد السابق ..نعود لوصف الجو العام
مازلت أجلس أمام الكمبيوتر..متدثرة بأى شئ له ملمس قماشى..وقادر على اعطاء شعور ما بالدفء...
وفى يدى كوب الينسون الطيب..واكتب ما تقرؤه انتم الآن
..
..
..
بذمتكو مش بداية رااااااااااااااائعة للعام الجديد..
لا بجد...دا شئ يحزن..
الواحد مش حاسس باى حاجة..
مش حاسة إنها ليلة العيد..
ومش حاسة بانها ليلة راس السنة
انا امبارح كنت بسأل والدى ..هو السنة الى احنا داخلين عليها دى..تبقى 2008ولا 2007!!!؟؟؟؟
بلاش اقولكوا بقى كان رد فعل الراجل ايه؟
بس بجد والله مكنتش بهزر
انا فعلا مش حاسة بمرور السنين خااالص..
تفرق ايه يعنى 2007 عن 2008 عن 2018!!؟؟
كلها سنين بتشبك فى سنين..واهو عمر وبيعدى وخلاص
أما بالنسبة للعيد بقى..
فبكرة مش بيمثل عندى أى شئ..غير انى بفكر هنزل ازاى الصبح فى الجو دا عشان أصلى صلاة العيد..
وبفكر هل هقدر أقوم من النوم أصلا وانزل معاهم..ولا هيسيبونى نايمة زى العيد الى فات...
جميلة أولى صلاة العيد..
هى العيد كله..
بمجرد ما برجع من الصلاة..وأنام واقوم..كدا يبقى العيد خلص خلاص..
شئ محزن برده مش كدا..
نفسى أرجع أفرح بالحاجات الصغيرة زى زمان..
نفسى أرجع افرح بليلة العيد.واللبس الجديد..وفلوس العيدية..
نفسى أرجع أفرح بليلة راس السنة..واستنى الساعة 12 عشان استقبل السنة الجديدة..
نفسى أحس بمرور الأيام..واقدر أعيش يومى...
بدل ما أنا واقفة اتفرج على الأيام وهى بتعدى..وكأنها بتمر فى حياة شخص اخر..مش حياتى انا........
شششششششت...
ايه الكآبة دى..
تخيلوا الكلام الى فوق دا كله..
كانت نية كتابته من البداية....
إنى اقولكوا..
كل سنة وانتو طيبين...
كل سنة وانتو سعداء..
ومبسوطين
كل سنة وانتو معاكو حد تحبوا تقضوا اليوم دا معاه..
 كل سنة وانتم طيبين بمناسبة راس السنة..
ربنا يجعل السنة دى..سنة سعيدة..وتحققوا فيها كل أحلامكو..
 وكل سنة وانتم طيبين بمناسبة العيد..
ربنا يكتر أفراحنا يااارب...وينصر المسلمين..
تحيتى..
12月19日 سبيسى العزيز...هابى بيرث داى تو يوسبيسى العزيز
كل سنة وانت طيب
 من سنة تقريبا..وفى وقت زى دا..وعلى ما أتذكر كنت فى امتحانات برده..
فكرت اعمل سبيس خاص ليا...
يمكن زهق من الامتحانات....او يمكن الواحد حس انه عاوز يقول كلام كتيير مش لاقى حد يسمعه...او يمكن كنت خايفة "الام اس ان" يخلوا السبيسز بعد كدا بفلوس..
فقلت اعمل واحد احتياطى
 ..المهم بدأت اكتب فى السبيس..
فى البداية مكنتش عارفة اكتب ايه؟؟لانى مكنتش عارفة انا بكتب لمين..
بعد كدا حددت أنا بكتب لمين ..وبناء عليه..بدأت اعرف سكتى فى الكتابة هنا..
حددت انى هكتب لنفسى...هكلمها...هقرب منها...يمكن احاول اتصالح معاها..
وبصراحة عداد الزوار كان من العوامل الى ساعدتنى اخد القرار دا..
 عشان كدا بعد سنة كاملة..حبيت بس اقول للمكان دا
شكرا كتييير..
 كنت متنفس ليا ساعدنى اقول حاجات كتير جوايا..
ساعدنى أرتب افكارى فى أحيان كتير...
ساعدنى أفهم نفسى
وساعدنى برده في أوقات كتير إنى أثور عليها..
 عشان كدا كان لازم افضى نفسى شوية من الامتحانات الى فوق دماغ الواحد دى ومش عاوزة تخلص
 ..واجى اكتب الكلمتين دول..عشان اطفى أول شمعة من عمر سبيسى النونو
واقوله كل سنة وانت طيب..وعقبال 10 سنين كدا يارب(مش ممكن اقول ميت سنة..خلينا واقعيين..مين الى هيكتب فيه بعد ميت سنة ان شاء الله
 ؟؟؟)وحبيت كمان..أشكر كل الناس الى دخلت السبيس بتاعى وشاركت فيه..
الناس الى شاركتنى مشاكلى وأفراحى....وأحيان كتير ..شاركتنى جنانى وأفكارى الغريبة..
 بشكرهم جداااا..
وبشكر السبيس اكتر لانهم عرفنى على ناس زيهم...
مها: انسانة زى السكر...توأمى فى عيد ميلادى...منتهى الذوق والأخلاق والشقاوة..
حبيتك اوىى لما قريت مشاركاتك هنا..وموضوعاتك فى سبيسك...وحبيتك اكتر لما اتعرفت عليكى..
بجد ربنا يوفقك فى امتحاناتك يارب همسة: شكرا ليكى..كنتى اول كومنت فى السبيس...شئ طبيعى طبعا مش اخوات
كنتى دايما مصدر دعم ليا...مش ممكن انسى لما جيت أقولك إن السبيس بتاعى عدد الزوار فيه بلغ ألف وسبعة وخمسين..
وقولتيلى انتى الألف طبعا..
بجد منتهى التشجيع
 بس بجد بقى...ربنا يخليكى ليا...ساعات كتييير بحس إن مصدر النور الوحيد الى فى حياتة..
نسمة الصيف الى بتخفف عنى الحر..الإيد الى ممكن تطبطب عليا وقت خنقتى...
وساعات تانية بقى
 .........بس برده...بحبك..
كيت: انتى بقى..خفة الدم نفسها..من أوائل السبيسات الى دخلتها..من قبل حتى ما اعمل سبيس...وافتكر يومها شدنى موضوع كنتى كاتباه عن كارنيه الكلية..لدرخة خلتنى اعمل ساين ان عشان اعرف اضيف كومنت...ربنا يكرمك يااا قمر...ويوفقك فى امتحاناتك رويال: حبيبة قلبى...مقدرش اعمل حاجة غير انى ادعيلك بكل شئ حلو..لانك متستاهليش غير كل خير ...خواطرك واشعارك تحفة جدااااا يابنتى..وفى نفس الوقت..دمك زى العسل..دا الى شدنى لسبيسك وخلانى شاركت فيه...وكانت اجمل مشاركة لانها خلتك تيجى وتشاركى هنا...ربنا يخليكى ليا ياااارب
وحشااااانى جداااااا..وأتمنى إنك تكونى بكل خير..
يمكن أكون ناسية ناس...بس انا حاليا مستعجلة جداااا لان ورايا شغل كتير اوىى..أن شاء الله هرجع واعدل البلوج عشان يطلع بشكل أفضل
تحيتى
11月19日 خبر عااااااااااااااااااااااااااااااااااااجل بقيت عمتوبكل الفخر والسعادة..
أعلن لكم..أنه فى تمام الساعة الثانية عشرة إلا عشرة من منتصف ليلة التاسع عشر من نوفمبر عام 2006
(من الآخر يعنى قبل ما ندخل فى يوم 19 بعشر دقايق)
شرف إلى الدنيا بتاعتنا دى..وزدوها نور وفرحة وجمال طبعا...
الأستاذ.............(معرفش اسمه بصراحة...لسه محددوش هيسموه ايه)
المهم يعنى..الى هو الأخ الى انا حاطة صورته فوق دا..
^
^
^
^
جه أخيرا عشان يخلينى أنا(وِأنا لسا فى عز شبابى والله) .....يخلينى عمتو...
وابقى مسؤلة بشكل جزئى فى تربية طفل لسا نونو...وأكون شخصيته براحتى بقى..
ولهذا قررنا...انه وإبتداءً من هذا اليوم..قد تسلمنا نحن (عمته وأبقى أخت أبوه فى نفس الوقت) مسؤلية تعليمه أولى مبادئ الشقاوة..واللعب والتنطيط...
وأكون مسؤلة إنى أفهمه وأدله على أقصر الطرق عشان يجنن بيها أبوه وأمه..
بس هو يفوق بس من الدوشة الى هو فيها دى..ويتغلب على الصدمة الى ولدتها عنده الانتقال من مسكنه الهادي إلى عالمنا المزعج...
وبعد ما يقف على رجليه ويفهم ان الدنيا مش هتقف ادام المحنة دى...ساعتها بس هركز معاه..وأوجه كل طاقتى عشان أطلعه أشقى طفل فى العالم..
عشان كدا..عاوزه كل الى يدخل هنا...
أولا: يباركلى على تشريف الكائن الغريب الى فوق دا..
ثانيا يهنينى بمنصبى الجديد..ويدعيلى إن ربنا يقدرنى وأقدر أنقله كل خبرتى..
ثالثا بقى ودى الأهم: يدعي للبتاع الصغير دا إن ربنا يخليه ...ويفرح أهله ومامته وباباه بيه..
ويبكبر بسرعة بقى عشان ألعب بيه...
قولوا أمييييييييين
10月23日 كل عام وانتم بخيرقبل بداية أول يوم من أيام العيد
وقبل ما يخلص اخر يوم من أيام رمضان
حبيت أقول
كل سنة وانتو طيبين
كل سنة وانتم بخير..وفى سعادة وحب
كل سنة وحواليكو ناس بتحبوها بتحتفلوا معاها فى اليوم دا
كل سنة والوحدة بعيدة عنكم..والحزن بعيد عنكم...
كل سنة وانتم طيبين
"من قلبى"
 10月2日 رمضان شهر القرآنسلام عليكم..
جاية النهاردة وجايبالكو افتكاسة جديدة من افتكاساتى فى الفوتوشوب..
التصميم عن رمضان واسمه ..رمضان شهر القرآن...
هو التصميم بسيط..بس أنا بحبه أوى..
يارب يعجبكوا انتو كمان..ولو مش حابينه...قولوا برده..أنا بحب النقد..
الواحد لسا فى أولى خطواته في الفوتوشوب..
ادى التصميم اهوووو
 يلا مستنياكو..
تحيتى 9月27日 كلمات كان لها أثريا خالق الخلق
فى بطون الأمهات..
يا خالق الملايكة والشمس والنجوم
.
.
يا مالك الملك..
والأرض والسموات
يا مبدع يا معين يا حى يا قيوم
.
.
يا محدد الاجال والعمر بين عينينا..
من قبضتك ادم
من قبضتك جينا
.
.
انت الى خالقنا
بضعفنا وقوتنا
وانت الى رازقنا وانت الى بتغنينا
وحتى لو غلطنا
متحرمناش من قوتنا
يا الله
الدعاء..بكلماته..وصوت عمرو دياب...
جميل بجد
دعـــــــــاءسلام عليكم...
ازيكو كلكو...
كل سنة وانتو طيبين..
رابع يوم رمضان...تخيلوا...اربع ايام عدت خلاص..
ربنا يقدرنا على الانتفاع بكل ثانية فى الشهر دا...
المهم أتا جايبالكو النهاردة..حاجة من تشخبيطاتى على الفوتوشوب...
عبارة عن دعاء سمعته للشيخ محمد متولى الشعرواى..
فبليييييز سيبكو من التصميم..هو بايظ بايظ...
المهم قولولى رأيكو فى الدعاء..
اتفضلوا ادى التصميم اهوو
 4月13日 ربنا يرحم الجميعبقالنا فترة ..فيه حالات وفاة بتحصل كتير عندنا فى العيلة..
طبعا الحمد لله على كل حال..وربنا يرحم الجميع..
أقرب حالة كانت امبارح...واحد قريبنا توفى..الراجل دا أنا كنت بحبه جداا..وكان طيب جداااااا...له ذكريات كتير اوىى معايا من وأنا صغيرة...
على الرغم من إن مشاغل الحياة ممكن تشغل حتى أقرب الناس إنهم يسألوا على بعض...إلا ان برضه الى فى القلب ...بيفضل فى القلب..
فعلا اللحظات السعيدة الى بتقضيها مع انسان بتفضل فاكرها كتير...وصعب أنك تنساها...
لما قعدت مع أختى بعد ما عرفت الخبر...قالتلى: انا الراجل دا فعلا هيوحشنى اوىى...مش معقولة اننا مش هنشوفه تانى..
قولتلها:ليه بتقولى كدا...بالعكس احنا هنشوفه تانى...كلها كام سنة ونشوفه...
لفت نظرى ساعتها إننا دايما بنبص للدنيا وكأنه مستمرة إلى ما لا نهاية..والموت شئ بيجى كل فترة يقطع علينا الخطة الى رسمناها لحياتنا....
بالعكس المفروض إن الدنيا دى هى الإستثناء...والآخرة دى هى الأصل.
اختبار مدته قصيرة اوى..اتحطينا فيه..وبعدين هيخلص ...وكل واحد هيروح لمكانه..جنة أو نار...
ومش عارفة كمان انا ليه بصيت للموضوع ساعتها من الناحية دى..
بس فعلا ساعتها...حسيت انى عاوزة أقابل قريبنا دا تانى..وإنه فعلا واحشنى...
فدعيت ان ربنا يهون علينا بالكام سنة الباقية لينا فى حياتنا...عشان نتقابل تانى...احنا وكل أحبابنا الى سبقونا..
المهم بس يا ترى هنتقابل فين..وحسابنا هيكون ازاى..؟؟؟
ربنا يرحم جميع أموات المسلمين...ويسكنهم فسيح جناته...
ويرحم قريبى دا..ويصبر أهله..ويصبر بناته...ويجمعنا بيه فى جنته سبحانه وتعالى
..
اللهم امين..
شكرا
يــــــــــاارب ""كلمة قريتها""!!؟(فإن مع العسر يسرا..إن مع العسر يسرا) إذا ضاق بك الأمر...
ففكر فى ألم نشرح..
فعسر بين يسرين..
لذا لابد أن يبرح..
3月22日 حاسس بلطف ربنا بيك..بقالى فترة شاغلنى معنى معين فى حياتى..
إن أد ايه ربنا لطيف جداا بينا ..
بجدالمعنى دا شاغلنى بقاله مدة.....
يعنى ايه ربنا بيلطف بينا..
يعنى كلمة بيلطف ؟؟؟وليه من أسماء الله الحسنى كلمة اللطيف...
كلمة اللطيف نفسها فيها أعلى معانى الحنان والرقة والخوف علينا..اد كدا ربنا بيحبنا...!!!
احنا فى تعاملتنا اليومية مع بعض...لو بصينا ليها..هنلاقيها فى اوقات كتييرة بتتسم بالخشونة والقسوة ...أغلب كلامنا مع بعض بيبقى فيه جفاء..
وحتى لو بنعامل حد بلطف...مش بيكون في كل الاوقات..
والتعامل "اللطيف" نفسه فى نظرنا بيبقى ازاى؟؟...
مجرد بنكلمه كويس..؟؟ بنضحك فى وشه..؟؟ بنخاف على مصلحته...؟؟
برده كل الكلام دا ميجيش حاجة جنب لطف ربنا بينا..
كام مرة جالك ابتلاء من الله سبحانه وتعالى..وزعلت وادايقت ...ومرت الايام واكتشفت انه كان لمصلحتك...؟؟
غير اللطف فى الناحية دى كمان..
أثناء الابتلاء نفسه...ربنا بيبعتلنا حاجات بتلطف علينا الصدمة...
لو فكرت فى كل ابتلاءات حياتك...ورد فعلك وقتها...
وتخيل كدا لو الابتلاء دا حصلك دلوأتى..
هتحس انك ساعاتها كانت اعصابك هادية جداا..وتستغرب انت ازاى اخدت الموقف بالبساطة دى...دى رحمة ربنا بينا والله يا جماعة...
بيأهلك نفسيا وقت الصدمة...وبيبعتلك حاجات حواليك تشغل تفكيرك عن المشكلة...
وبعد الصدمة بيبعتلك رسايل تفهم منها ان الى كنت فاكراها مشكله دى طلعت فى الاخر نعمة ربنا انعمها عليك..وانها أهون من حاجات كتيييير...
كل الرحمة دى واللطف دا...ادامها اختبار صغير اوى ربنا بيحطنا فيه..وبيمتحن صبرنا...بيشوف هنصبر ولا لا...امتحان يمكن تكون مدته دقايق او ساعات...هو رد فعلنا عند الصدمة الأولى..أول كلمة هنقولها هتبقى ايه..؟
إنما الصبر عند الصدمة الأولى..
والله يا جماعة المشاكل كدا كدا بتحصل..وكدا كدا بتعدى..وزعلنا وحزننا عليها مش هيعمل حاجة غير انه هيتعبنا زيادة...
لكن كلمة""الحمد لله"" أو ""لاحول ولا قوة الا بالله""..تتقال ساعتها...هتخفف من تعبك كتيير...
والكلام دا والله عن تجربة...
يمكن تلاقوا الكلام مش مرتب..بس فعلا دا كلام خارج بدون أى تنسيق...وفجأة حسيت إنى عاوزة أكتبه..لأنى حاسه الفترة دى أد ايه ربنا لطيف بينا فى الابتلاءات الى الواحد بيتعرض لها..حتى فى وسط المشكلة..بقيت بحس برحمة ربنا اوىىى...
يارب المشاكل الى الواحد بيتعرض لها..تقدر تفوقه من الغفلة الى هو فيها..ويعالج التقصير الموجود فى علاقته بربنا ...ويقدر يشكر ربنا كفاية على نعمه وحبه...ولطفه بينا...
2月6日 كليك بسيط..بس دافع عن رسول اللهكلنا طبعا سمع عن الاهانة الى وجهتها صحيفة دنماركية للرسول عليه الصلاة والسلام
وعلى الرغم من كل الاحتجاجات الى قدمتها الدول الاسلامية الا ان الجريدة مقدمتش اى اعتذار "رسمي" يتناسب مع حجم الاهانة الى مست قائد ومربي عظيم مثل رسول الله صلى الله عليه وسلم بل ومست الدين الاسلامى ككل..
انسب حل طبعا هو المقاطعة الفعالة لانها على الرغم من سهولتها الا انها الحل الاكثر تأثيرا والسلاح الاكثر فعالية بالنسبة لاقتصاد اى دولة..
وبجانب المقاطعة ...دي مجموعة طرق وصلتلى على الايميل وحبيت اجمعها فى مكان واحد للى يحب يقدم شئ إيجابي ...يقدمه من قلبه للرسول الحبيب وهو حاسس بتقصيره وبساطة العمل لكن أمله فى ان تعظمه النية..
اولا
ادخل على الموقع التالى وسجل بيانتك لترسل رسالة توضح اعتراضك على ما حدث وذلك إلى خمسة وعشرين جهة مسئولة اقتصاديا وتجاريا فى الدينمارك
فقط ادخل هنا
ثانيا..
تابع المواقع التالية..
ثالثا
الرابط التالى هو عبارة عن موقع لاوبرا وبنفري مذيعة التلفزيون المشهورة...والموقع بيعمل استفتاء عن البطل فى حياة الانسان..ادخل وسجل بياناتك واتكلم عن رسول الله..
لان البطل الى هيتم اختياره هتفرد حلقة خاصة من البرنامج للحديث عنه..
لو مش عارف تكتب عن الرسول بالانجليزى استعين بأى مواقع اسلامية انجليزية..
رابعا
عاملين استفتاء على موقع أوروبي يناقش هل للمسلمين حق للاحتجاح على الرسومات الى تستهزء بخير المرسلين؟؟
والى الان كانت الاجابة بــ"لا" هى الغالبة..
وكأن علينا ان نقتل ونهان ولكن فى صمت..
ادخل وانصر اخوانك فى أوروبا وصوت بنعم
Yes
على الرابط التالى
خامسا
تصويت اخر على موقع
CNN
على يمين المقال تجد السؤال
Should the European press have published cartoons of the Prophet Mohammad? و معناه ... هل كان ينبغى على الصحف الأوربية نشر صور النبى محمد - صلى الله عليه و سلم? صوتوا بــ NO
سادسا
استفتاء آخر على موقع جريدة " لو موند" الفرونسية..
أعلى الصفحة على اليسار تجد الاستفتاء..
وترجمة السؤال كالتالى..
--أمام الجدل الذي أثاره نشر كاريكاتورات تصور النبي محمد والتي ربطته أحيانا بالارهاب، ماهى ردة فعلك؟؟--
1- تفهم الاستياء والغضب الذي اثارته فى صفوف المسلمين
2-ترى ان الضجة مبالغ فيها فهي فى النهاية مجرد رسوم
3- لا رأي لك في الموضوع
جزاكم الله خيرا
يمكن يكون جهدنا قليل..ورسولنا ليس بحاجة إليه لان له رب يحميه ويدافع عنه..
لكن احنا محتاجين الجهد دا..علنا نجد ما نرد بيه عندما نسأل يوم القيامة..
ماذا قدمتم للإسلام؟؟؟؟؟؟؟ 2月5日 هدفك ايه؟؟كلمة سمعتها فى اعلان على قناة سمارتس واى...
كانت جميييلة جداا.. بتحكى عن ان كل واحد لازم يبقى عنده هدف يعيش عشان يحققه ويمر فى سبيله بالصعاب ويصبر لغاية ما يوصله..
الكلمة كانت بتقول..
هات ورقة وقلم واكتب حلمك فى أول الصفحة واسمك فى اخر الصفحة.. ممكن تكون المسافة بينك وبين حلمك بعيدة..
وكل ما تحقق حاجة تقربك من حلمك ارفع اسمك شويه..
هيجى يوم يتلاصق اسمك مع حلمك وتوصل لهدفك..
ياترى كل واحد عنده هدف ولا لا؟؟
ولو عندك ايه هو الهدف دا..؟؟؟
مهما كان هدفك صغير فهو مهم..لان انت بشخصك ونفسك الى خلقها ربنا ...فى حد ذاتها مهمة ...وبالتالى اى حاجة متعلقة بيك تبقى مهمة جداا.. اوعى تسمع لحد بيستخف بيك او بحلمك... خليك واثق من نفسك ومن قدرتك انك فى يوم هتوصل..
ولما توصل..لحظة سعادتك هتنسيك كل الى التعب الى تعبته...
يارب كل واحد عنده حلم يحققه..وانا معاكو طبعا...
قولوا امييين 2月4日 لسه زهقان؟؟؟لو حاسس انك زهقان ومدايق وحاسس ان مفيش هدف أدامك..
ادخل هنا وحمل الكليبات دى من على قناة سمارت..
وشغلها اكتر من مرة فى اليوم..
هدف الكليبات التلاتة دى انها تبرمج عقلك على الحماس والعمل ضد كل الاحباط الى بيقابلنا يوميا فى حياتنا
وشكرا
|
|
|
